
Ofnbakaðar ungnautaorður
Fyrir 6
Hráefni
1,2 kg meyr nautavöðvi í 100 gr steikum (td. fillet eða framfillet)
1 stk græn paprika
1 stk rauð paprika
1 tsk kúmen
½ tsk kórianderduft
1 tsk fínt saxaður engifer
2 stk hvítlauksgeirar fínt saxaðir
2 stk litlir rauðlaukar
4 stk belgbaunir
½ tsk thimian
1 stk rauður chilli
2 dl rauðvín
2 dl nautasoð dökkt (eða vatn og kraftur)
Sósa
Fylltar kartöflur með osti
6 stórar kartöflur
3 msk smjör
2 eggjarauður
½ dl rjómi
salt og pipar
1/4 tsk rifið múskat eða duft
100 g rifinn ostur
paprikuduft
Aðalrétturinn
Brúnið steikurnar á pönnu og setjið í eldfast mót. Skerið grænmetið í fallega strimla og steikið á pönnunni í smá olíu. Bætið hvítlauk og engifer á og því næst soði og víni. Bætið í kúmeni, kóriander og thimian. Hellið yfir steikurnar í pottinum og bakið í 10 mínútur við 200°C. Færið steikurnar upp á diska, ausið vel af sósunni yfir. Einnig er hægt að bera réttinn fram í mótinu.
Fylltar kartöflur með osti
Þvoið kartöflurnar vel og sjóðið þær óflysjaðar. Skerið lok af þeim langsum og takið sem mest innan úr hýðinu með skeið. Maukið með eggjarauðunum, heitum rjómanum, kryddi og smjöri í skál þar til blandan verður létt og ljós. Setjið með skeið í kartöflubátana, stráið rifnum ostinum yfir og svo paprikudufti. Bakið við 200°C þar til kartöflurnar eru orðnar vel brúnar.
Þessi réttur er úr metsölubókinni Veislubók Hagkaupa 1997
Höfundar
Árni Þór Arnórsson, Ingvar Siguðrsson, Óskar Finnsson, Kristján Sigfússon